يعقوب موسى النور

ودمدني كانت أيام جميلة

يعقوب موسى النور

==============

هو يعقوب ابن موسى ابن النور ابن مدني القاضي ابن  احمد القاضي ابن  دفع الله قراش الحصا ابن مدني تور الفجة ابن المكي ابن مدني وزن الالف ابن ودمدني السني.

كنت أمنى النفس أن اعود الي السودان واجلس معك بالقرب من دكان جدنا حسين ابوطبيلة وكنت دائم السؤال عنك اها يعقوب جا اللية وقعد في الكرسي قدام الدكان وكنت امنى النفس أن اسمع منك الكثير عن تاريخ هذه المدينة العشق الكبير وانت الخبير بكل ركن وزقاق فيها عشت فيها بالطول والعرض وتركت بصمة وطرائف سوف تظل في الذاكرة ابد الدهر سوف تذكرها الاجيال التالية.

أذكر اخر مكالمة تلفونية  لي معك وانت في السعودية انك ارسلت لي الكثير من المساهمات والحكاوي عن مدينة ودمدني عن طريق ابن العمة ازهري يوسف عامر.

كان القدر اسرع اوعدك ان اكمل الصورة عن هذه المدينة وتاريخها الابيض الناصع سوف اجتهد وابحث وانقب عن تاريخ احياء المدينة وعوائلها ورموزها في مختلف المجالات.

===========================

الكثير من هذه النوادر كان وقتها وتوقيتها في الزمن القديم زمن الفرفشة والبهجة والتي عمت المدينة كلها كان الاغلبية من الشباب والرجال يعيش في زمن الجاهلية انتشرت المسكرات والقعدات حتى عهد الرئيس نميري والذي قام بأقفال  البارات والحانات وانحسار هذه الظاهرة والتوبة النصوحة للكثيرين وربنا يغفر كل شئ الا الشرك به.

الثلاثي او الرباعي لو ضممنا لهم معلم حسبو شبك انت وبيومي طه واحمد شبك ويمكن ان يكون خماسي اذا انضم لكم عبدالعظيم بونو يمكن ان نطلق عليهم ظرفاء ودمدني العظماء تجمع بينكم الالفة والمحبة وحب الناس وحب هذه المدينة فأنطلق لسانكم يرسل الدرر لسكان هذه المدينة ويتناقلها الجميع كطرائف ونكات لها مواقفها والتي قيلت فيها.

من اظرف ما قاله الخال يعقوب موسي النور ايام هجمة الضرائب علي الدكاكين في سوق ودمدني اثر الكثير من التجار ان يغلقوا متاجرهم وانت تسير في السوق ترى دكان فاتح ودكانيين قافلين وهكذا عندما شاهد يعقوب منظر السوق هذا قال عنه ان سوق ودمدني بقي زي الكلمات المتقاطعة.

واحدة من نساء الحلبة تريد الذهاب الي السوق وهي تقف بالقرب من قبة ودمدني  ومرت من امامها الكثير من البصات والحافلات ولم تقف لها فأخذت تدعوا  وهي تقول يا يوسف ابوشراء توقف لي عربية كان يعقوب واقفا وهو يستمع الي دعاء المراة فقال لها الواقفة جنبه دا ود السلموني .

يعقوب ولده السنى فى امتحان الشهاده تحصل على نسبه كبيره كانت كافيه ليدخل كلية الطب وذلك نزولا عن رغبة اصحابه انصار السنه كتب رغبته دراسات اسلامية الشئ الذى خز فى نفس يعقوب  وقال لولده ديل اخير منهم انصار السنه بكسر السين وعندما ذهب للعمل بجامعة المدينه تزوج شقيقة زميله وهى سوريه واتصل على ابوه وقال ليهو انا عرست واحده سوريه من طرطوس يعقوب قال ليهو ماكان تجى هنا ماعندنا ناس البطلوس.

يعقوب ويوسف ودالباهى مشوا يجيبو المعلوم  وعند دخولهم وجدوا زحمه شديده وقفوا جنب الباب حتى يخف العدد شويه فى تلك اللحظه جات كشه من البوليس الضابط سأل يعقوب انتو واقفين هنا ليه يعقوب قال ليهو عايزين نسوق عمال قال ليهم خليكم واقفين وقال لاحد العساكر خليك واقف فى الخارج واقفل الباب فى تلك اللحظه يوسف قال لي يعقوب ممكن اطلع بالفتحه بتاعة تصريف المويه الوسخه يعقوب قال ليه جرب ويوسف كان نحيل الجسم قفل انفه بيده واستغاث بالشيخ يوسف قائلا يايوسف لى يوسف واتخارج بعد شويه جاء الضابط بعد تم القبض على الجميع وقال لى يعقوب وين الزول المعاك يعقوب بكل سخريه قال ليهو والله دا مشى ابوحراز.

يعقوب الممرضه بتسال فيهو أسئلة عشان تملأ الاورنيك الخاص به ليدخل غرفته تمهيدا لإجراء العمليه لرجله التى اشرف عليها ابن عمتى ازهرى قالت ليه الحاصل شنو قال ليها انا دخلت الغرفه وكانت مظلمه مديت يدى عشان اولع النور المفتاح كان بعيد منى وقعت على الأرض الممرضه قالت ليه لما وقعت ضربة شنو قال ليها ولا اورنيش ماضربت.

في احد الأيام كانوا جالسين امام بيت ناس شبك على الشارع وبيدبروا فى امر المزاج  يعقوب قال عندى شلن وقال  واحد تاني  عنده اربعه قروش واخر قال عنده سبعه قرووش واثناء المناقشه والتضريب جاء ابوالروس من ام صوفه  يخيط فى الشارع وقف قدامهم قال ليهم ممكن ياجماعه سفه يعقوب اداهو الحقه سفه وختاها فى جيبو قال ليهم ياجماعه ممكن حاجه نتعشى بيها يعقوب قال ليه ياخى اختانا انت عندك راسين مليتهم نحنا واحد ماقادرين نملاهو.

مره ألمت به وعكه وقرر الطبيب ليعقوب ان يرقد فى المستشفى وهو في المستشفى فى احد الأيام حامل البشكير على كتفه احد الزوار وهو داخل لمح يعقوب سأله مالك فى المستشفى يعقوب قال ليهو جيت استحمى وراجع.

كان يعقوب جالسا جلسته المعتادة لمح ولد صغير يخرج من بيت ناس عبدالعاطي جدنا ويقع في البلاعة خارج المنزل في تلك اللحظة خرج محمد عبجي وقال له يعقوب في ولد صغير وقع في البلاعة وبي سخريته المعتادة رد عبجي سيبه زيه في كتير جوه.

وداعا يا خال كنت  اخر الظرفاء وربنا يتقبلك القبول الحسن والجنة مستقرك كنت فاكهة ودمدني .