بابكر سليمان احمد زراع والشهير بي ( زراع )

                    ودمدني كانت أيام جميلة

بابكر سليمان احمد  زراع والشهير بي   ( زراع )

=====================================

والد زراع هو سليمان أحمد زراع جاء من شندي استقرت العائلة في حي المدنيين.

انت جايي من القبة فى شارع التراب في طريقك لبيت ناس سلام... على يمينك دكان العم أيوب ابوطبيلة  وبعده زاوية خليفه على وبعدها زاوية على سابق تتجه يمين زي الماشي فريق الحلبة يلاقيك بيت ناس ياسر وعاطف وعادل الحجري وبعدين بيت كان يسكن فيه اسماعيل عطية ( تسما ) كان يعمل في الصحة ويلاصقه بيت كان يسكن فيه الفنان عبد العزيز المبارك هو بيت العم أبوزيد السيد حاليا ويقابله بيت على بيك من العيساب....

 بيت الأسرة مقابل بيت ود الرملي الجزار.

  حضر سليمان احمد زراع والد الظريف بابكر زراع مع أخيه ابراهيم وشقيقتهم سعدية التي تزوجها السيد أبوزيد وابناؤها الطيب وابوزيد وضيف الله والعمات فاطمة وعزيزة ورابحة والدة دقدوق كان يعمل زمان في البلدية كاتب ومنزل ناس دقدوق بالقرب من محطة الاشراف ناس العجوة .....

 والدة زراع اسمها كتوشة وله شقيقه اسمها السرة بت سليمان منزلهم الآن في العشير....

سليمان احمد زراع كان مقدم للشيخ عبد السيد وملازم له و لأبنائه حتى شياخة الشيخ حمدالنيل.....

سأل احد اقرباء سليمان احمد زراع سأل شيخ قنديل ابن الشيخ عبد السيد بتعرف سليمان احمد زراع رد عليه شيخ قنديل كان بشيلنا في صفحته .

 كان زراع يحضر لمنزل العائلة في حي المدنيين  برفقة والده كل يوم خميس ويرجع لوالدته يوم الجمعة....

يحكي قريبه  كانت امهاتنا يجمعوننا في غرفة واحدة حتى رجوعه لأنه كان يعتدي علينا بالضرب......

 يقول قريبه قابلته قبل وفاته بزمن طويل في السوق ومعي شقيق زوجتي... الدويش.... سألته إن كان يعرف شخص اسمه سليمان احمد زراع... اندهش وقال دا ابوي قلت ليهو تتذكر لما أبوك يجيبك لينا في البيت وانت بتدقنا...... ضحك وقال بسرعة خلاص ارحكم بيتكم عشان تدقوني........

الرياضى المطبوع الذى لم يكن يستطع البعد عن ودمدني  يشارك اهلها افراحهم وأتراحهم يزرع الفرح فى أحيائها ويرسم الإبتسامة على وجوه أهلها كذب من قال لك انه رأى زراع عابس الوجه بل كان يعادى كل من حوله بالمرح والحيوية .
كان عليه رحمة الله سريع البديهة حاضر النكتة والقفشة لا تراه الا أنيقا متعطرا لا يخلو مجلس من مجالس ودمدنى من كلمة ( زراع قال) تسرى نكتته فى دار الرياضة ودمدنى بعد دقائق من اطلاقها لتتناقلها المدينة صباح اليوم التالى فى اسواقها وخاصة في  سوق الصياغ  .

كانت اخر مرة رايته فيها في مدينة جدة حضر للعمرة  وفي منزل الاخ عاطف  عبدالمنعم عبدالعال وبحضور نفر كريم من ابناء ودمدني تداعوا الي تلك الجلسة التاريخية والتي تميزت بالقفشات والزكريات عن الحبيبة ودمدني-  بعد فترة زمنية قصيرة سمعت بوفاته .

من قفشاته او كما يقال في هذه الحالة زراع قال –

كما هو معروف حبه للباسطه وكان عبدالقوي صاحب ألشانزليه يعز زراع جدا ودائما ما يرسل له صينيه صباعات معموله خصيصا لرزاع .

 كان لزراع صديق اسمه قسيمو كانو علي اتفاق للذهاب لعزاء في جزيرة الفيل وعندما جاء لزراع لقي زراع بين صاحي ونائم وقسيمو طوالي فتح التﻻجه وزراع سمع صوت التﻻجه قسيمو لقي في التﻵجه باسطه وعجوره اكل من الباسطه كم صباع علي السريع . زراع سالو اكلت شنو ياقسيمو فرد عليه ﻻ اكلت العجوره فرد عليه زراع : العجوره دي طرشا مافيها صوت وﻻ شنو .

مرة جات ليلي سليم اخت الهادي سليم وبلة سليم ماشة وهو دايما بمزح معاها قال ليها عندي ليك خبر سعيد شداد امبارح قال عاوزين باك لفت للهلال وانا رشحتك.

زراع عندو جارو عندو سبعة اولاد كلهم صغار وبصحو من الدغش يكوركو ويوم زراع قابل ابوهم في الشارع وقال لية والله الشاعر القال يا ربي ما تحرم بيت من الاطفال لو كان شاف اولادك ديل كان شرط القصيدة.

مرة باع حمام لاحد الأثرياء وهذا الثري فلس وهو ما عارفه مشي ليه اديني فروشي رد قال ليه ما تستعجل انا سايقك معاي كاس العالم وبذكائه رد فصدك كاس دورة  ابو ليلي

الاخ على ابورونجا مشجع نادي الاتحاد المشهور  تعرض لحوادث كثيرة وربنا سلمه منها حادث بص الركبي الشهير وضربة المرتزقه فى السلاح الطبي وحادث التاكسي جوار جامع الحكومة فقال له زراع بعد ده الا ملك الموت ده يشيل ليهو عكاز وينتظرك فى ركن بيتكم .

يحكى زراع بانه ذهب الى الخرطوم وقد تدهورت مدينه مدنى فى كل المجالات فقال له احد سكان العاصمه...اها مدنى خليتا كيف....زراع قال ليهو....مدنى.....وسكت....مدنى غنايها من الشبارقه وهدافها من فداسى.

ومن طرايفه يحكي انه بالاستاد داعب واحد شديد النحافة فغضب النحيف وقال لزراع والله اسع اقوم اضربك فرد عليه زراع تضرب شنو والله انت لو بصقت تفقد سوائل

عمل بالامارات وكان برفقة الفاضل سانتو وجاتنا إشاعة مفادها انو زراع عمي من شراب الريحة، لقيتو يوم في السوق بعد حضوره لمدني وهو ممسك بابرة وخيط وهو يدخل الخيط في خرم الإبرة وهو يقول  اها يا ناس مدني( مشيرا الي انه غير اعمي.)

قال لي واحد صديقه اسمه علي نفسي في كمونيه مشوا الجزاره الفي السوق الجديد والجزار بعرفو وكان سافي تمباك وعنده عواره في الشفه قام زارع سٲله الفشفاش دا نفختو انت اجاب بنعم وهو مبسوط رده زراع كان ٲنت نفخته عجله انا ما بركب فيها

كانت عشة والدة الفاضل سانتو في تلك السنوات مع الفاضل في دبي ومعهم كالعادة زراع ، وكانوا علي الغداء والحاجة عشة كرهت أكل الدجاج قالت لي زراع كل يوم جداد كرهتونا قام زراع قال ليها يا حاجة آكلي ساي هنا اي جدادة عندها شهادة ميلاد الفاضل ولدك ما عندو شهادة ميلاد .
مرة كان مسافر مع الحاجة عشة للإمارات وفي الصالة قام احد ضباط الجمارك بفتح شنطة عشة وتفآجا الضابط بوجود أكياس مربطة في الشنطة وكل ما احاول افتح كيس تقوليهو ده فيو شطة الفاضل بحبها الضابط أمسك كيس، تاني اقول ليها ده شنو تقول ليه ويكة اصلو الفاضل بحب الويكة، زراع عاين ليها قال ليها يا حاجة لو الفاضل بياكل الحاجات دي لو ركب تكس ما يجيب قون .

مرة حضر عيد الأضحى في القاهرة... الناس اعني الطلبة لمو قروش و قعدو يتغالطو نجيب خروف سوداني و لا خروف روماني قام زراع قال ليهم خلوني من السوداني عضلاتو قوية و عندو غضروف ما جاي كداري من كردفان جيبو لينا الروماني الجاي بالطيارة.

مباراة الاهلي بالدويم مع احد فرقها تقدم الدويم بهدف فارعدت المدرجات وهاجت المقصورة اشاعةإشاعة وانتفض الاهلي وامطر شباك الدويم وبلغ الهدف الخامس وصمت الاستاد تماما فهب زراع واقفا ملتفتا نحو المقصورة صائحا يا ناس الدويم طه القرشي خرجو من المستشفي واللا لسه .

 يحكي احد الاخوان مرة كنت في اجازة وجيت ماشي جنب حلواني عمنا الفكي جيلاني وهو قاعد جنب الحاج وبابكر الترزية وسلمت ومشيت علي عجل قام لحقني قال يا ود جيلاني بقيت تغيان سافرت السعودية ساعتين والله الطيران الطرناه جبريل ماطاره
طبعا شقيقه مرزوق السباك كان ملتزم دينيا والبيت واحد مفصول مرة واحد لاقاه قال ليه يازراع جيت البيت ولقيت اخوك مرزوق رد عليه انت دخلت دار ابي الارقم
لقي حجة عشه ام الفاضل سانتو  في حي المطار رايحة قال ليها الجابك هنا شنو قالت ليه بفتش في بيتنا قال ليها عرسك محمد فضل
يوم زواج الفاضل لقي حجة عشة عاجنة الحنة قال ليها دي شنو ياحجة قالت ليه دي للفاضل العريس قال ليها ولدك دة الا تحنينه بي زبادي
كان زعلان من ادم شتيمة وفي احدي المباريات كان شايل صندوق ابردات تذاكر المباراة اتلفت علي عبدالمنعم عبدالعال قائلايا ريس ديل الاكلوا التفاحة.

 يحكي احد الاخوان عند وفاه والد الديبه الله يرحمه مشيت العزاء  واصر الاخوان ان نتغداء  وبعده اوصل زراع معي وفعلا جابو اكثر من عمود اكل وكل عمود فيه نقطه او نقطتين بالمنكير الاحمر زراع طوالي علق قال لي الفليم هندي وعند فتح العمدان اتضح ان كل العمدان تحتوي الطاسه الاولي علي ارز مفلفل طوالي صاح انتو الميت ابوالديبه ولا ماو تسي تونق .

كان يحب تربية الحمام وله برج جميل مرة كنت معه وكانت الموية قاطعة والحمام عطشان قالي لي دقيقة ماشي الدكان وجاء يحمل صندوق مليان قزاز فرات ابيض واحضر طشت وقام بإفراغ كل زجات الفرات الأبيض للحمام .. كان يقفل برج الحمام الساعة ستة مساء وعندما تأتي حمامة بعد ذلك لا يفتح لها الباب ، اقول لي ياخ افتح الباب خلي الحمامة تخش اقول لي دي حمامة هاملة ومطلوقة خليها تطير محل كانت

مرة جاء زراع لدكان الشيخ محمد حامد وجد ثلاثة شتلات صغيرة سأل عن صاحبها فقيل له حقات صلاح الحارس قال يزرعا وين لي غنمهم البقبضوا بلنتى.

لقي يوسف قولر قاشر ومتريح قال ليه  ماشي وين رد عليه ماشي  نادي الجزيرة قال ليه والفيل وديتو وين.

مرة قاعدين جنب شجرة بيت ناس طلال سوتيبه جاء بيومي طه راكب الفيسبا ولابس النضارة السوداء  قال قطعة الشطرنج وصل طبعا بيومي لونه ابيض شديد وفيه حمرة .

ومن طرائفه . حضور سيره للحله الجديده واحد من ناس السيره ﻻحظ البلد كلها غير زراع ماعندها حاجة زراع جا وزراع تعال ضوق الضلعه دي وزراع زراع.قام قال اﻻ يقعد مع زراع العامل لخمه للناس. قعد مع زراع وسالو حكايتك شنو الناس كلها زراع.زراع قال له زراع والله بحيهم وبحبوني وماف زول ف مدني اﻻ بعرفو وبعرفني.قام الضيف قالي هس لو جيت السوق الشعبي وقلت للتكسي وديني لي زراع وقالي مابعرفك؟ اعمل شنو؟ رد زراع قال ليه ﻻﻻ ياابوي بتكون نزلت الحصاحيصا وﻻ الكاملين -

ومن حكاياته يقول اخ لنا كنا مساهرين معاه في البيت وكان معي الاخ هشام عبدالعاطي ابن المرحوم عبدالعاطي محمد عبدالعاطي والذي كان يعمل امين عام الحكومة بمدني وكلما يتم تغيير الوالي يصير عبدالعاطي الوالي مؤقتا حتي تعيين الوالي الجديد والمهم عندما عرفت زراع بالأخ هشام طوالي زراع عرفو وقال ليه خليني من أبوك الزي الجنريتر دا -

في ايام الرياضة الجماهيرية وبعد انضمام لعيبة الاندية لفرق الروابط يقول احد الذين عاصرو زراع  كنا نلعب بفريق القادسية بالقسم الاول وكان زاخر بالنجوم عاطف عجورة له الرحمة وعصام كورنر وعواض عابدين وثقة وعقد فريد من لعيبة الزمن الجميل وكنا في مباراة لا اذكر بالضبط ضد اهلي مدني ام ضد نجوم الكرة بودمدني وقدمنا ماتش رائع وكان زراع يتابع المباراة وبعد انتهاء المباراة اطلق دعابة فحواها عاطف وايهاب دي كورة ولا عيد ميلاد -

في اليوم الاول من عيد الاضحي كنت اقوم  بجوله بصحبة نفر من ابناء القسم الاول هكذا يحكي محمد ود الزبير  فكانت قبلتنا الحله الجديده لمعايدة الراحل زراع فلم نجده في منزله سالنا فوجدناه عند احد جيرانه لزوم قعده العيد كما هو متعارف عند مجتمعنا السوداني
اها سلمنا وقعدنا معهم وجدناهم اربعه اشخاص
وهم في انتظار اخر
ذهب لياتي بصحن شيه من منزله نظام ضوقو
ضحيتي وهو في اعتباره الشيه بمقدار اربعه اشخاص ولا يعلم ان العدد اذداد بحضورنا ليصبح ثمانيه اشخاص
اها صاحبنا جاء شايل الصحن فتفاجئ بزيادة الاشخاص فاحتار ماذا يفعل وفي لحظه ادخل الصحن في دولاب كان في الممر لداخل الصالون ودخل علينا زراع شافو فتح الدولاب اها قول لي يأخوي دي شيه ولا إلبووم صور مدخلها في الدولاب –

من طرائف المرحوم انه لمن ماتت امه كان المدرب المرحوم ابوليلي غير موجود في مدني وكان خارجها في مهمة كروية ولمن رجع قرر ان يمشي الى زراع في البيت عشان يشيل معاهو الفاتحة قام ركب الموتر بتاعو وتوجه نحو بيت ناس زراع وقبل ان يصل وقف الموتر في طلمبة اجب السوق الجديد القريبة من ناس زراع وقبل ان يدخل زقاق ناس زراع قابلو زراع وش قام ابوليلي رفع يده وقال لزراع الفاتحة زراع قال ليهو ما بشيل معاك الفاتحة في الشارع انت قايل امي ماتت في حادث حركة وبعد شوية زراع شاف موتر ابوليلى واقف في الطرمبة قام قال لـ ابوليلي يا ابوليلى انت لمن تمشي لمبارك سليمان (لاعب الثوار المعروف وشقيق احمد الناظر والمرحوم عثمان رباع) قاعد توقّف موترك في الدايات.

كان صديق لجمال السيد لاعب نادي الثوار .وكان جمال من اشهر مربي الحمام في مدني .وكان زراع متلح جمال كل أسبوع عاوز جو زين حمام اللهم لمن زراع كترها كل جمعة جاييه في البقالة مرة زهج منو قال ليه  كملت لي حمامي تاني ما بديك. زراع عاين ليه وضحك قال لي جمال خليني من حمامك الزي اولاد سوسو ديل .
طبعا اخونا  نزار سوسو وأخواته في طفولتهم زي القنايات.

مرة زراع بنهر في الغنم من جنب شجروا وزعلان الغنم كرهونا اكلو الشجر !واحد جا ماشي قال ليه  ازرع ليهم شطة .!زراع قال ليه  عشان كل واحدة تجي شايلة ليمونتها معاها –

حكي أنه في يوم زواجه المطرة من الصباح للعصر ما وقفت ويغرف في الموية ومشمر هدومو والجماعة معاهو يغرفوا والمطرة شغالة .رفع يديه وقعد يناجي يا الله هووووي الليلة يوم عرسي انا ما قاعد أتيرب ( يعني أزرع ) .

وفي احدي المرات وجد فنان في الصياغ قال تعال يااخوي امبارح حرمتنا النوم الليل كلو تغني اللبن ابو لي بي انت عندك حيرقان ولى شنو زعل الفنان قال ماتزعل يوم الخميس عيد ميلادي تجي تغني لي رد الفنان قال ليهو انا الفاضي ليك يوم انا محجوز زراع قال ليهو والله انت لوعملت شكلة مافي زول يحجزك

مرة كنا يحكي الفاتح خليفة  معزومين مع مبارك سليمان غداء بمناسبة حضورو من لندن في اجازة ايام الدراسة ومعنا زراع وجات صينية الغداء ومن ضمن الأصناف توجد سلطة روب في صحن كبير وكان معنا في الغداء اخونا السر ميرغني وكان يجلس قصاد سلطة الروب وانا شايف السر اكل السلطة كلها وقولتا لي زراع يا زراع بالله جرب سلطة الروب دي جميلة كيف وقال لي يا ابوي السلطة الضربا السر دي كانت ضربت البيت الأبيض هو خلي فيها حاجة -

يحكي اخونا الفاتح خليفة ومرة كنت ماشي الهند مشوار سريع بتاع اسبوع كدا وكلمت زراع وقال لي لازم تجيب لي اللبسة الهندية ويقصد البنجابي وفعلا جبتو واديتو ليه والظاهر طلع ضييق وما حبة يكلمني وقابلتو بعد فترة وقولتا لية ان شاءالله البنجابي طلع مقاسك قال لي وحياتك عامل رجيم مما جبتو لي لي يوم الليلة ما قادر البسو .

 زراع قال لي اخونا فتوح ود شيخ عبدالله محمد الامين قال لية بالله انت شاب انت الزمن دا الشباب بصحو علي زغزغة العصافير وانت يصحوك من دغش الرحمن يقول ليك قوم أملا الأباريق

قيل أنه تمت دعوته من قبل صلاح الحارس ( رجل نكته ايضا صديق للرياضيين ويمتهن بيع المعدات الرياضية علي الواقف ليس له محل ) بمارنجان اها زراع قال ليه عازمنا شنو ياود مارنجان ؟ صلاح قال ليهو لحوم بس ضان ودجاج عيش مافي عشان تعرف حاجه ... زراع قال ليهو يابوي مارنجان شنو ألفيها لحمه ؟ ياخ انتو زمان لما تجو تلعبو شليل العضم الا تجيبوهو من الدرجه .

.يوم زراع قاعد جنب البيت كالعاده برش بي الخرطوش والكلب الجهامه بتاعو راقد جنبو جا داخل  موسى الثعلب سلم وختا كيسه وقعد بعد شويه جا داخل واحد نشال من اولاد مدني ومافي داعي لي ذكر الاسامي سلم وقعد وزراع يعاين ساي بعد شويه جا داخل واحد مشبوه وبرضو من اوﻻد مدني سلم وقعد قام زراع بكل سخرىتو البنعرفا ديك وقبل علي الكلب وقال ليهو إنت داير تهوهو متين بعد يجيني المتحري .

المعروف عنه انه كان محبوبا يقال انه ربطته  علاقه مع بعض الخضرجيه بالملجه وكانوا دايما ما يطلبون منه ان يذهب معهم لقريتهم حيث الكرم والجود والشهامه الخ وكانوا يقولون  مدني شنو اللحم راس ومدني شنو وكما ذكرت فهو معروف حبه لمدني قبل دعوتهم وذهب معهم لفريتهم وقد وصلوا ليلا وهو صامت فوق راي عند الصباح اخذوه في جوله حول القريه وعند الصهريج استوقفه منظر تربيزه صفيره بها شنكل فسالهم دي شنو قالو ليهو دي الجزاره فقال لهم يا عرب انتو بتتكلموا في مدني مدني حكام كوره ساي 3 شناكل

يقال أن المرحوم زراع كان غاضبا جدا من الضابط الاداري ..... فقد رفض طلبة بتعالي ... و في أحدي الايام بينما الرواد جلوسا في مقصورة أستاد ودمدني إنتظارا لمباراه هامة إذا حضر أخونا المذكور و هو يتمخطر بمشيته المعروفة و التي قصد بها التعالي و أظهار العظمة متخطيا الجلوس بصورة لافته للنظر و هو يتقدل مزهوا بمركوب النمر الجديد الذي أبتكر له مشيه مخصوصة ... فما كان من زراع إلا و أن قال للجلوس بصوت عالي ... والله النمر سيد الجلد زاتو ما بمشي كدا –

مره عايز يعمل عملية عيون الاخ  عيسى حامد عمل ليه كشف وعيسى بقول للناس يا اخونا زراع دا عايز يعمل عملية فى مستشفى مغربى وعايزين المساعدة والناس كلها بتدفع وصلو دكان عزالدين هافانا وعيسى قال ليه  زراع عايز يعمل عمليه فى مستشفى مغربى عزالدين قال ليه هو مغربى دا مستشفى شنو قال ليه نساء وولاده.

مره فى السوق قال لي واحد  يا فلان جيب الف جنيه  والله ماعندى يازراع لحدى ما وصل طارق شقدى قال ليه  يا ود شقدى الف جنيه  بالله طارق قال ليه  والله ماعندى زراع قال ليه  ياخوى انت ود ود شقدى ولا ود الفتلى .

حكى ذات مرة أن لاعب الأهلي السابق ( قاسم سنطة له الرحمة ) عنده كشك سمك في السوق الجديد( السوق الصغير ) يستأجره شخص من قرى مدني ... وسنطة كل صباح يمر على المحل يفطر ويأخذ سمك لبيته ، وتضايق المستأجر من هذا التصرف المتكرر ونصحه الناس بأن يكلم زراع الساخر حتى يوقف سنطة في حده ، قابل زراع سنطة وقال له : يا سنطة إنت مؤجر للراجل ده الكشك ولا مؤجر ليهو البحر .

يهوى " زراع " تربية الحمام وشيد قفص جميل لهذا الغرض وجلب حمام أبيض اللون وبعد فترة تكاثر الحمام ، فرغب زراع في أداء العمرة أوصى شقيقه للإهتمام بالحمام فترة غيابه ، ولم يهتم أخوه بذلك ، فطار الحمام الأبيض بعيداً بلا رجعه ، وحل بالقفص حمام أزرق اللون عجبه المكان وسعته ..... وعندما عاد زراع من سفره قال لأخيه إنت حمامي نزلتوا المنطقة الصناعية ولا شنو الواحد عندما يمشي المنطقة تتسخ ملابسه ويتغير لونها من الزيوت والشحم الي لون اخر   ؟-

كانا هو و صديق له ينتظران ثالثهما( جدّو ) ليذهب ثلاثتهم لتقديم
واجب العزاء بأحد أحياء ودمدنى ، كان جدو داخل البوفيه الذى يملكه في الصياغ
و لمّا طال بهما الإنتظار صاح به زرّاع : يا جدّو ياخ إتأخرنا على الفاتحه ،
ردّ جدو : دقيقه يا زرّاع أرمى الطعميه دى ،
فما كان من زراع إلا أن صاح به : ياخى الجمرات وّكلّوا ليها .. ما توكل
أى واحد يرميها ليك .

يحكى عن زراع أنه ....
رأى جاره الغلبان ذات يوم يستعد للخروج على غير عادته فجرا فداعبه قائلا وين يا أخونا صاحى من بدرى كدا اشتغلت مؤذن ولا شنو!
فرد الجار أكل عيش يا زراع أخوى فرد زراع على الفور ضاحكا ولو بتاكل باسطة تصحى الساعة كم!!!
كان يرتاد ميادين الروابط والليق لمشاهدة التمارين وذات مرة شاهد احد اللعيبة يمتاز بقوام افريقى رهيب وهو يسخن وعندما نزل اللاعب الى الملعب اتضح ان مستواه موش ولابد فعلق زراع ساخرا:
الجسم من غانا والكورة من ودعشانا!!
ودعشانا احد محطات السكة الحديد بين كوستى والرهد لا شان لاهلها بممارسة كرة القدم ولا تأتى فى أولوياتهم الحياتية-

يحكي احد اللاعبين -كنا لاعبين كورة في احدي القري ومعنا زراع وطبعا ميادين القري تكون خارج القرية جنب الحواشات وفجأة نشوف ليك لاعبي الحلة والحكم والجمهور كلهم جارين علي الحلة واخونا زراع جاري وراهم وفضلنا نحن وبعد شوية حصلناهم دخلنا النادي ونحن مخلوعين سألنا زراع الحاصل شنو قال لينا العرب ديل ما بجروا ساااكت… . بعد شوية المطرة دي ما تديك الدرب التفت لينا ..ما قلت ليكم الحمدلله الجرينا

يقول احد الاخوة كان ياتي لنا في ميدان بانت ويتم ضمنا انا وبعض الاخوة  عند تقسيم المباراه وقد اختارني زراع في تقسيمته من الاول باصرار شديد واثناء المباره كان من المفترض ان امرر له الباص ولكن فضلت ان العب الكرة موزة من الزاوية التي كنت اتواجد بها الي المرمي مباشرة فجاء الي غاضبا وقال لو بتجيب دي كان الليلة بتنا في الخرطوم وعندما لم امرر له للمرة الثانية سمعته يشتكي ويقول الواحد فيهم خاتي ليهو وقاية في راسو وعامل فيها افرو فقد كان يقصدني الشعر الافرو موضه الشباب في تلك الايام بعدها التفت الي ودالمصريه وهو يلعب في خانة الباك الايمن لابس شنكار يلتف عليه شريط ضغط فمازحة انت ياود المصرية الجناح الماسكو دا عقرب ملفلف ليهو كدا وعند انتهاء المبارة كانت السماء ملبدة بالغيوم وبدات تمطر ولم ينسي اني لم امرر له الكرة في اكثر من مناسبة فصاح غاضبا اها ميدانكم دا تاني الا كان تشركوا فيه  للسمك.

لما سجل مريخ العاصمة عماد عبدالعزيز كرار (عمدة) من مريخ الحلبة قررت ادارة المريخ عمل مهرجان كبير وتكريم بعض الرموز التي ستستفيد منها ماديا كالحاكم وقتها عبدالرحيم محمود (رحمة الله عليه) بنجوم ذهبية سمع زراع بالخبر وقابل في مناسبة هاشم ديدي وقال ليهو انا بستحق تكريم ونجمة وانا الخليت عماد يمشي المريخ ديدي قال ليهو نحنا بندي الناس البنستفيد منهم اتلفت وراهو لقي ود ابو راي وطبعا معروف ود ابو راي كان اسرع لاعب في مدني قال ليهو خلاص ياديدي النجمة خليتا ادوني ود اب راي دا قال ليهو يازراع ود اب راي تعمل بيهو شنو قال ليهو داير اعملو دعاية عجلات ومواتر

في امارة دبي ونادي النصر ايام مجد الفاضل سانتو في الامارات ولزوم الونسة والترفيه الفاضل كانت عنده كل الدنيا يطلب في أي وقت فالاجابة حاضرة من الشيوخ لهذا استخرج اقامة الي امه عشة والي صديقه زراع ويقال انه عمل لفترة بالمطافي-  ومدني كلها متابعة هذه الرحلة العجيبة وتاتيهم اخبار زراع كل يوم بالجديد وخاصة المناكفات مع عشة ام الفاضل وكانت تقول لزراع ياولدي يازراع لو لقينا الحاجة دي وديناها مدني كررت هذا الكلام كثيرا كلما رات شي اعجبها زراع لمان زهج منها قال ليها ياحاجة اقعدي ساكت والله السيل ماكان جابك هنا طبعا الكلام دا قبل برج الشيخ خليفة بن زايد .                                                                           .

 زراع بقي بوليس موية ولبسوه هدوم المطافي وماقدر يطلع السلم وزاراع شرب الريحة وعمى ونظره بقي ضعيف .-

زراع وإن اختلف الناس عليه لم يحمل يوماً ضغينة لأحد برنامجه كان تحركاته لجميع وفيات المدينة وعلى رجليه رغم تداعيات مرضه وضعف بصره يداوم على معاودة كل المرضى وصلة الأرحام من خلال المجاملات -بقلوب مكلومة و حزينة شيعته المدينة الاربعاء 22/9/2006م الفنان المبدع و صاحب الطرفة المميزة و الحضور اللطيف و الدم الخفيف المرحوم زراع

....... إلا رحم الله هذا الرجل الذي أمتع المدينة و جعلها هاشة باشة تضحك علي أحزانها -  و أسكنه اللهم في فردوسك الاعلي مع الصديقين .. فإننا نعرف أن قلبة أبيض كالحليب لا يعرف مكرا و لا ضغينة
الهم ربي إن كان محسنا فزد في إحسانه .. و إن كان مسئا فتجاوز عن سيئاته .. و أجعل قبرة روضة من رياض الجنة ... و ألحقه بالصالحين و الشهداء و حسن اؤلائك رفيقا

آنسك الله فى قبرك بقدرما آنست وافرحت اهل مدنى الصابرة فلقد كنت بار بها وعاشقا لها ولأهلها .

رحمك الله يازراع رحمة واسعة.