أولاد الطهور

ودمدني كانت أيام جميلة

أولاد الطهور

================

يتشرف محمد عبدالله علي  بدعوتكم لتناول طعام الغداء بمنزله بحي المدنيين وذلك يوم الجمعة الموافق 19/4/1970م والعاقبة عندكم في المسرات .

شوفتوا العاقبة عندكم في المسرات دي يعني تجي وتدفع في الكشف ولو الكرت اخر شئ فيه وشكرا برضو بتدفع ولو الي اولاد الطهور تعصر ليهم تحت المخدة  تلقى ولد الطهور راقد في العنقريب وفي يده اليمين مجموعة من الحلويات والبسكويت وفي اليد الاخرى فكة من القروش تعني تعالوا وادفعوا لي النقطة او العادة .

التجهيزات من الصباح في بيت الطهور قدح الصباح جاهز العصيدة وملاح الروب والتقلية والفطير عملوه من كم يوم والشعيرية والسكسكانية والفول المشدود في الحلة الكبيرة انتهى والطعمية رموها من بدري والخروف ضبحوه ومعلق في باب الشارع بسلخوا فيه .

أولاد الطهور من امس بالليل عملوا ليهم الحنة واليوم من الصباح في الحمام وبعد داك لبسوهم العراريق الجديدة وسرحوا ليهم شعرهم وعملوا ليهم الضريرة في نص الراس وربطوا لي كل واحد الهلال علي جبهته ولبسوه السيموتا  والخرزة واظن دي من العادات النوبية القديمة .

جابوا التاكسي من الشارع الرئيسي الناس كتار الماشين معاهم يحضروا الطهور عربية عثمان خالهم مابتشيل وخاصة ان خالتهم فوزية قالت لازم تمشي معاها بنتها وفوزية دي لعلاعة وبتزغرد كويس لازم تمشي .

انتو يا جماعة الاولاد ديل بطهروهم وين والله ابوهم اتفق مع محضر العملية بابكر محمد سعيد كنان مشى ليه امبارح في العملية الصغيرة في العيادة الخارجية بالمستشفي واتفق معاه يجيب الاولاد الساعة سبعة صباحا في بيته في المزاد .

العربيات عندما وصلت الي المنتزه جنب بيت الخال بابكر اخذت تلف حول المنزل وصوت الزغاريد ينطلق من داخل العربات صحيت انا من النوم كنت  نائم عند ناس خالتي نفيسة عمر كنان زوجة خالنا بابكر  امبارح كانت في حفلة كاربة في المزاد وماقدرت امشي بيتنا في الدرجة ونمت مع صاحبي محمود بابكر ولابد ان نقوم من الصالون الطهور تجري عمليته في الصالون عين مفتحة وعين مغمضة   حضر اولاد الطهور دخلوا واحد خالنا بابكر عنده طربيزة رقده فيها وفي ثواني تمت العملية والتي تطورت وانتهي عصر الخياطة بالكتكت  القصة بقت جفت ومشرط ودبلة زي خشم الانوبة تلبس وتلف بالشريط طبعا قبل دا حقنة البنج  ازدادت الزغاريد والاغاني واحدة من ناس الطهور وزعت من كيس تحمله في يدها الحلاوة .

بعد ختان كل الاولاد ركب الجميع في العربات وودعونا بي زغاريد تجمع كل اهل الفريق والكل يعلم ان اليوم في اولاد طهور عند خالنا بابكر .

وصل اولاد الطهور الي بيت المناسبة خرج جميع من في البيت لاستقبال الاولاد بالزغاريد وبمصاحبة ايقاعات صادرة من الدلوكة ومجموعة من الشتامة .

استقر اولاد الطهور في السراير المخصصة لهم والمفروشة بالسجاد المزركش وبدأ اصحاب البيت في تجهيز الفطور علي ود خديجة ملهلب ما انتظر الفطور جاء مارق ليه بصحن حق مرارة اكله كله ما خلا فيه  الا الفشفاش .

صدرت اصوات من اولاد الطهور تنم  عن الشعور بالالم امهم نادت نادر الكبير اخوهم وقالت ليه جيب ليهم بيبسي من الدكان في محاولة لاسكاتهم الظاهر انو البنج فكا  وهاك ياولد حلاوة وهاك يا ولد بسكويت  بعد فترة طويلة سكت الاولاد .

ختوا  صواني الفطور علوية نظرت الي فاطمة اجي يا يمه مافي شيه في الصينية يا اختي ما بعدين في الغداء في ضلع هي ماكانوا يختوا لينا حتة لحيمة او عضيمة .

انتهى الفطور وتم ترويق البيت البنات الشابات في العائلة عليهم القش والمسح وتفريش السراير .

في الراكوبة الكبيرة كانت مجموعة من النساء من الجيل الوسيط في العائلة مهمتهم شد الاكل للمناسبة محاسن عليها حلة البطاطس وعلوية مشهورة بعمل الكمونية وسلوي ونادية عليهم عمل المحشي تقوير الطماطم والكوسا والاسود والفلفل والبطاطس وعمل الحشوة وكمان عليهم عمل سلطة الاسود وسامية وعفاف عليهم عمل الضلع وسلقه وتحميره وعمل ام رقيقة من شوربته وسهى عليها عمل الكباب بالكبدة والكلاوي والقلب وحتة لحمة مخصصة لذلك وبطاطس وكم علبة بسلة لصنع هذا الكباب ونوال عليها عمل المكرونة البختوها في السرويس ومن فوق ليها الضلعة  ميرفت وهدى عليهم عمل الكاسترد والخشاف او مايعرف بالتحلية  .

الكل منهمك في تجهيز الغداء وناس البيت جابو حلل القيزان من الجيران ومن اهلهم في حي المدنيين وكمان حلل الشد المتوسطة والسراويس وصحون الغرف والصحون المفطحة .

جيرانهم ادوهم ديوانهم فرشوه ليهم وسوف يكون مقر اضافي للغداء للمعزومين ديوان البيت تم تجهيزه ليستوعب عدد اثنين سفرة للمعازيم وتم تعبئة برادات الماء بالثلج والماء التلج جابوه من مصنع حسين عوض وتم توزيعه علي البرادات المصنوعة من التوتيا لم تظهر بعد البرادات البلاستيك الحمراء اللون .

دائما الشاي في المناسبات بتمسكوا البنات السمحات عشان كدا تلقى الشباب ملتف حولهم والحيلة ادونا كباية شاي او قهوة ماعارف ليه البنات ديل ما بنات خدمة بحبوا الراحات والتمسح .

بدأ الناس في التوافد علي بيت المناسبة وتم تجهيز الصواني وخرج الغداء للمعازيم وتم كفاية كل المعازيم سفر كل سفرة بتشيل حوالي ثمانية افراد بس الصواني الاخيرة قصر الضلع في عدد اثنين صينية تم تعويضهم بعدد صحنين كباب للصينية الواحدة وتحلية زيادة  والحال مشى كل صينية مباشرة التحلية جاهزة ليها والشاي والقهوة الحمد لله انتهت المناسبة والناس كلها اتكفت والعاقبة عندكم في المسرات ملت علبة الحلاوة والكشف الماسكو ود دفع الله شكله جاب حاجة كويسة.

مبارك خال اولاد الطهور ركب التاكسي حقه الكونسل ومشى الدباغة جاب الكيتة وبمجرد وصولهم وعزفهم اجمل الالحان تجمع كل الناس في الفريق وبيت المناسبة  والكل يرقص  وبتاع الكيتة لما جنس قروش في اليوم دا .

البص حق السيرة وصل وركب الجميع وقدام بص السيرة تاكسين وعربية واتحركت السيرة والبنات والدلوكة والغناء حتى شيخ المدينة الكبير الولي ودمدني السني ونزول الجميع للزيارة في الاول اولاد الطهور ومن ودمدني السني الي الشيخ سعدابي الفيه الشجر كابي والشيوخ ابو شبكة والشيخ ابودواية ونزل الجميع عند سعدابي للبحر عند القور وتم غسل راس وايادي وارجل اولاد الطهور ودي عادة نوبية قديمة .

من سعدابي لابد من زيارة الاسد ابودين مافسد الشيخ احمد ودكنان حيث ان والد وام اولاد الطهور جدهم الشيخ ودكنان .

من ودكنان وبي شارع النيل حتي لفة دردق وقد تم اخذ الاحتياطات اللازمة الناس في السيرة في بداية دردق سكتوا بطلوا الغناء حتي تم اجتياز هذه المنطقة ونجوا من الحجارة والتكشح بالتراب حتى وصلوا جزيرة الفيل ودخلوا منطقة الجنائن وتم تزيينة عربة اولاد الطهور بي جريد النخل والناس نزلت والقاعد يقطع في الجوافة الحمراء اللون والليمون الجنينة حقتهم .

رجعت سيرة اولاد الطهور بي نفس الطريق وصمت عند حدود دردق حتي وصلت الي السوق الكبير ووقفت السيرة جنب ستوديو موريس الاطرش وتم تصوير اولاد الطهور صورة تذكارية كل واحد مصور ماسك السيف .

وصلت السيرة بيت ناس الطهور وبدأ الغناء سواقنا زينة حالف  مايدلينا ودور بينا البلد دا والزغاريد والصريخ حتى توقف البص تماما ونزل الجميع بعد قضاء يوم تاريخي لاينسى من ذاكرتهم  مهما مرت السنين.

والعاقبة عندكم في المسرات.