غسيل العدة
من أرض المحنة
غسيل العدة
=============
مما دعاني لكتابة هذا المقال هو المناكفات والتي تحدث يوميا بين أبنتي ميار وامها بسبب غسيل العدة ويا ماما خلي لي نظافة البيت وامسكي انت غسيل العدة تدخلت انا وقلت الي ابنتي انتي في زمن الراحات ماشفتي ناس حبوبتي وامي واخواتي وامك زمان كانوا بعانوا كيف في غسيل العدة .
اولا البحث عن الجردل وتعبئته بالموية والبحث عن الطشت حق العدة وأين يوجد في البيت طشت اخر لغسيل الهدوم ويجب التفرقة بينهم وين صابونة الغسيل او حاجة عشة كما كان يطلق عليها امشي يا ولد هاك القرش جيب صابونة من الدكان طيب العدة دي لمان نغسلها نكفيها وين كلمنا يوسف النجار يعمل لينا نملية حقت عدة حتى الان ما عملها يابنتي جيبي العنقريب الصغير داك واكفي فيه العدة نسوي شنو .
يا امي وين الليفة شيلي يا بنتي الطرورة او الفرامة او سكين الصفيح دي واقطعي ليك حتة حبل من كراب العنقريب داك اعملي حسابك ماتفرتقي الجلاد حقه انا عندي الجلاي او السلك الناعم عشان تجلي بيه الحلل ولكن يا بنتي بلي ليك شوية رماد في العلبة دي عشان تجلي بيه الحلل.
يا يمة العدة دي كتيرة انا براي مابقدر عليها خلاص يا بنتي بخلي اختك تغسل معاك انتي اضربي واختك تمصمص ليك .
غسلوا كويس يا بنات وخاصة حلة اللبن يوم داك خجلت لامن مشيت اجيب اللبن كان شوفتو ناس علوية حلة اللبن حقتهم تضوي زي المرايا اجلوا الحلة دي كويس يا يمه لو جليناه شديد الحلة دي بتنقد بعد دا انتي سويها لو انقدت بنوديها عند الحلبة بنرقعها ونصلحها.
موية العدة دي يا بنات بعدين دفقوها بعيد في الشارع محل التراب الكتير الهناك لانو فيها دهن وزيت كتير بعدين الكبابي فوطوهم قبل ماتدخلوهم في البترينة والحلل نشفوا منهم الموية وختوهم في البترينة بي تحت حلة اللبن ختوها لي في النملية سيد اللبن بعد شوية بجي .
بعد ماتنتهوا خلوا اخوكم يجيب ليكم من الدكان ربع زيت سمسم عشان تمسحوا بيه يديكم .
غسيل العدة عند ابنتي الان الصابون صابون فيري السائل والليفة حقت العدة والجلاي اشكال والوان وحوض الغسيل في المطبخ فيه الموية العادية والموية الحارة وتلبس المريلا من المشمع اول حاجة وتلبس في يدها الجوينتات وموية الغسيل تمر عبر المجاري وبعد الانتهاء من غسيل العدة تمسح يديها بأنواع من الكريمات انا ما بعرف اساميهم شئ سائل وشئ كريم وبعد دا ماعايزه تغسل العدة لو في طريقة الواحد يقدر يرجع البنت دي للزمن القديم حتي تتعلم غسيل العدة الحقيقي.
تعليقات
إرسال تعليق